Lambi Loðnefur

Fann þetta ekki á sænsku...

2008-01-03T08:58:00.000-08:00

Keðjubréf?

2007-12-06T06:08:00.000-08:00

Ætli lífið hans lamba hafi verið svona mikið drasl vegna allra hótunar-keðjubréfa sem honum hafa borist í gegnum tíðina og ekki sinnt eða er einhver önnur ástæða fyrir misförum þessa ljúfa lambs?

Andskotinn!

2007-08-17T02:40:00.000-07:00

Það er óþolandi þegar svona lið fær að tjá sig um fáránlegar hugmyndir sínar. Hver kaus þetta mannfífl yfir okkur?

http://www.mbl.is/mm/frettir/innlent/frett.html?nid=1285782

Kaffitár

2007-05-10T05:12:00.000-07:00

Í Morgunblaðinu í dag gerir Kaffitár tilraun til þess að ræna Sigurð titlinum "Íslandsmeistari kaffibarþjóna í mjólkurlist 2007". Þar er birt heilsíðu auglýsing og annað sætið titlað íslandsmeistari í stað Sigurðar. Ósvífni?

Lengsti langi föstudagurinn minn!

2007-04-08T17:01:00.000-07:00

"Aldrei fór ég aftur vestur" hét hátíðin sem Lambi var á um helgina. Lambi keyrði í tíu tíma til þess að komast á þessa "aldrei fór ég aftur vestur" hátíð og skilur fyllilega, eftir þá ökuferð, nafngiftina. Til að byrja með var ferðin bærileg, því eins og flestir vita er vegurinn til Hólmavíkur alveg ágætur og var Lambi þá líka grunlaus um puttalingana sem síðar birtust til þess að hrella hann. Í Hólmavík álpuðust Lambi og félagar nefnilega til að stoppa og pissa en höfðu þá tveir ferðalangar setið klukkustundum saman og beðið eftir vel innrættum og auðtrúa Lömbum til þess að ferja þá á Ísafjörð. Lambi var í minnihluta þar sem hann sagðist ekki kæra sig um feita útlendinga í yfirfullan bílinn sinn og að nokkrum mínútum liðnum sat ég, Lambi, klesstur upp við hornös frá Þýskalandi á leið upp á Steingrímsfjarðarheiði. Bíllinn hafði þyngst til muna með þeim afleiðingum að hann dró rassinn í mölinni og spændi upp bensíni....og það er ekki fyrr en á miðri heiðinni sem Lambi tekur eftir því að bensínnálin er farin að hrapa, hann bókstaflega sér hana skríða niður á við. Nú ef þið skoðið kort getið þið séð hversvegna Lambi varð eins áhyggjufullur og hann varð. Hvorki hann né félagar hans áttuðu sig á því að á Reykjanesi mætti fá bensín án nokkurs fyrirvara á einum heilagasta frídegi ársins (þó að við vitum öll þegar að Jesú steig upp frá dauðum eftir þennan fyrsta langa föstudag fyrir svo löngu síðan). Við keyrum upp að bóndabæ og er þar ráðlagt að halda yfir á Reykjanes sem við gerum og fáum bensín (sem útlendingarnir lofa að borga í en þykjast síðan vera lamaðir og heyrnarlausir þegar kemur að því að greiða fyrir.) Sigurður borgar bensínið og ætlast til þess að gera upp við fúllendingana síðar. Þarnæst keyrum við yfir Eyrarfjall og misþyrmum bílnum aðeins frekar á leiðinlegum köflum sem á vegi okkar verða. Við þræðum firðina alla að Skutulsfirði í myrkri og ljótu útlendingarnir eru farnir að kvarta yfir seinagangi. Loks komum við á Ísafjörð, við keyrum um bæinn og finnum skemmuna sem hátíðin var haldin í. Við stöðvum bílinn og útlendingarnir stíga út úr honum. "Thanks for the lift" segir maðurinn og ætlar að ganga í burtu. Lambi starir forviða á þessa þrjóta og segir "we were thinking that you'd pay us a little bit of gas money". Mannfíflið verður strax hálffúlt "Oh, how much?" Lambi, fúll á móti og ákveðinn: "Four thousand!" Þá fer þessi litli lygalaupur að röfla einhverja vitleysu um að hann sé einhverskonar sjálfboðaliði á Íslandi og eigi engan pening (sjálfboðaliði frá montenegro hér? hvað er hann að gera?) Þá kemur annar ferðafélagi Lamba inní málið og býður þeim að borga þrjú þúsund. "One thousand each" segir svíðingurinn og ber því við að annars hafi hann ekki nógan pening fyrir sígarettum. Nú er Lambi orðinn ólgandi reiður og segir hreint og beint nei! Hann hefur sko ekki verið að troðast í eigin bíl klesstur upp við bílhurð í fimm klukkutíma til þess eins að fá að borga bensín undir hálfvita. "I don't think that is enough!" Segir Lambi og skammast aðeins. Eftir einhver orðaskipti borgar maðurinn loks þrjú þúsund og fer. Lambi situr eftir FÚLL yfir þessu bölvaða vanþakklæti, frekju og tilætlunarsemi. Lofar sjálfum sér því að taka aldrei framar ferðalang uppí bílinn og fara aldrei til Svartfjallalands. Í dag kom Lambi aftur heim, það var betri bílferð sem tók ekki tíu klukkutíma og klessti engan upp við neitt.

Hausinn á Lamba...

2007-03-30T18:59:00.000-07:00

...er ekki eins góður í laginu og hann var einusinni. Hann hefur, bara í dag, fengið á sig tvær kúlur. Þannig er að Lambi var rak höfuðið upp undir skáp í vinnu sinni í dag og fékk að eigin sögn heilahristing. Hann vankaðist og var óglaður ásamt því að hljóta af heilmikinn höfuðverk. Síðar sama dag var Lambi á gangi með Sigurði sem var að segja eitthvað mjög kjánalegt og Lambi leit til hliðar, gekk á skilti og Sigurður hló. Nú er Lambi með tvær kúlur og afskaplega ósáttur.

Gah!

2007-03-29T07:39:00.000-07:00

Lambi stakk skítugu skrúfjárni sem hann var að nota á skítug gleraugu á bólakaf í puttann sinn. Ái ái ái. Nú á Lambi eftir að deyja úr blóðeitrun eftir nokkra daga. Aumingja Lambi, ef honum blæðir ekki út fyrst. (og já! lambi var lengi að skrifa þessa færslu sökum fötlunar).

heilsusamlegt?

2007-03-29T05:38:00.000-07:00

tómatsósan sem ég kaupi er 70% sykur 80% litarefni og 40% rotvarnarefni. Og ekki halda að ég hafi ekki áttað mig á þessum prósentutölum. Þetta er ógnvekjandi!
Annað sem er ógnvekjandi er að meira að segja svona gáfað og yfirvegað fólk eins og ég getur átt 'stupid moments'. Ég var að skoða myndir á netinu áðan (augljóslega af fimm ára gömlum átröskunarsjúklingum) og skyndilega fannst mér eins og ég væri gamall flóðhestur í samanburði. Þá hringdi ég í Sigga og bað hann um að koma með aðrar buxur fyrir mig sem gætu kannski haldið einhverju af þessu inni. Hann kom með buxur, AF SJÁLFUM SÉR, fimm númerum stærri en allar mínar buxur! Þá varð ég enn leiðari.

er þetta normal?

2007-03-27T17:54:00.000-07:00

Hversvegna les maður alltaf þessar fréttir með viðurstyggilegu fyrirsögnunum eins og "Grillaði kærustuna á veröndinni"? Þá finnst mér sá sjúkleiki að kreista bólur á sofandi fólki skárri.

Þá hefur Lambi loksins fréttir að færa.

2007-03-25T09:30:00.000-07:00

Sigurður Tómas Guðmundsson er íslandsmeistari í mjólkurlist 2007. Lambi átti stóran þátt í góðu gengi Sigurðar og hefur gengið svo langt að halda því fram að allt sem Sigurður gerði RÉTT í keppninni hafi verið honum að þakka. Nú hlakkar Lambi mikið til að komast til Belgíu á heimsmeistarakeppnina. Sigurður er hinsvegar örlítið kvíðinn því hann neyðist til að greiða flugfar Lamba eins og um hafði verið samið.

Ég ætla líka að óska öldruðum foreldrum mínum til hamingju með perlubrúðkaupsafmæli sitt, þau eru 30 ára í dag!

Lambi í Finna-landi

2007-03-03T09:41:00.000-08:00

Lambi er nú kominn til Helsinki, hann situr með tölvu sem ber undarlegt nafn í fanginu og á að fá rauðvínsglas eftir smá stund. Lambi skilur ekki tungumálið og reynir að svara á sínu eigin undarlega tungumáli þegar hann er ávarpaður.

Lambi er ekki svo viss um að litla undarlega flugvélin komist alla leið tilbaka á mánudaginn, hann var látinn taka rútu úr flugvélinni yfir á flugvöllinn í dag og þótti það ekki traustvekjandi.

Hafið það nú gott,
kv,
heimsborgara-Lambi.

Bara Putin?

2007-02-26T13:57:00.000-08:00

Ekki segja mér að það sé bara Pútín sem hefur áhyggjur af því að samkynhneigð sé lýðfræðilegt vandamál?

Æ Æ Æ

2007-02-24T13:47:00.000-08:00

Lambi er lasinn. Hann er með bólgu á stærð við tennisbolta í hálsinum, hausverk, hor og voða mikinn hita. Og þetta allt saman rétt áður en hann fer í flug. Lambi verður ábyggilega, eins og alltaf, veikur í útlöndum.

ÖSKURDAGUR

2007-02-21T11:02:00.000-08:00

Lambi heyrði ansi skemmtilega útgáfu af Gamla Nóa í dag. Þrír litlir kallar komu inn og kváðust ætla að flytja frumsamið lag. Í ljós kom að lagið var gamalt en textinn frumsaminn og Lamba þótti hann nokkuð góður. Ég ætla að skrifa niður textann fyrir ykkur og mælist til þess að hann sé sunginn með lítilli ljósri röddu sem gæti tilheyrt átta ára barni.

Gamli Nói, Gamli Nói
drekkur pepsí.
Hann drekkur pepsí
til að vera sexsí.
Gamli Nói, Gamli Nói
drekkur pepsí.

Siggi hefði viljað hafa vísuna svona:

Gamli Nói, Gamli Nói
drekkur ekki kók.
Hann drekkur pepsí
til að vera sexsí.
Gamli Nói, Gamli Nói
drekkur ekki kók.

Mér finnst útgáfan hans Sigga mjög góð en það er eitthvað voðalega sjarmerandi við hina. Fyrst fær maður að vita að gamli Nói drekkur pepsí. Svo fær maður að vita af hverju. Þetta er allt sett fram á mjög skýran hátt.

Annars er það að frétta af þessum degi að eitt frekt lítið barn kom inn og kallaði eftir afgreiðslu um leið og það reif upp hurðina og ætlaði síðan að heimta tvöfaldan skamt af nammi útaf 2 fyrir 1 tilboðinu. Þetta barn byrjaði svo að syngja, með kórnum sínum, svo hátt að Lambi neyddist til að bakka nokkra metra því honum varð beinlínis illt í eyrunum. Kórinn var fínn en þetta eina barn hefur augljóslega ekki farið í söngskóla eða kór og telur víst að söngur gangi útá að öskra svo hátt að fólk biðji um miskun.

LAMBI FÆR RÓS

2007-02-18T09:31:00.000-08:00

Lambi situr á kaffihúsi með Lambínu. Skyndilega stekkur Lambína á fætur og segist ætla að ná í kaffi niður. Lambína er lengi. Lambi bíður. Svo birtist Lambína, og dregur fram rós. Þá bregður Lamba og strákarnir á næsta borði fara að hlæja. Lambi var búinn að afskrifa alla rómantík á konudaginn því hann veit hversu gleymin Lambína er. En Lambi fékk sem sagt rós.

ÁSTÆÐA ÞESS AÐ EKKERT HEYRÐIST FRÁ LAMBA

2007-02-15T01:45:00.000-08:00

Já, ég átti í erfiðleikum með að skrá mig inn hér. Minnist þess ekki að hafa þurft að haka við neitt samþykkisdrasl í hvert skipti sem ég skráði mig inn áður en nú þurfti þess greinilega! Og verandi eins vitlaus og Lambi er, hélt hann að sjálfsögðu að einhver hefði stolið leyniorðinu hans og breytt því svo Lambi kæmist ekki inn og gæti ekki bloggað (svona er að vera með rammpólitískt blogg)....því Lambi hefur enn ekki fengið öryggislykil sendan heim fyrir bloggið.
"Ég var sko búinn að reyna margoft og hefði einhver sagt mér frá þessu asnalega viðhaki væru nú komnar allmargar færslur sem ekki munu birtast úr því sem komið er" - segir Lambi aðspurður, í ónotalegum tón.
Lambi ætlar nú að taka sér nokkurra klukkustunda hlé fram að næstu færslu til þess að jafna sig á þessari bölvuðu vitleysu.

KOMMENT!

2007-02-06T16:16:00.000-08:00

Ég gerði það meðvitað að hafa síðustu bloggfærslu mjög stutta svo ættingjar mínir með athyglisbrest gætu líka komist í gegnum hana, það hefur ekki virkað! Mig er farið að gruna að aðeins einn ættingi hafi lesið hana og látið síðan afkvæmi sitt skrifa undir fyrir sig....

EKKI NÓGU GÓÐUR?

2007-02-02T17:49:00.000-08:00

Lambi spurði mann um daginn hvort honum þætti Lambi ekki nógu álitlegur afgreiðslumaður. Þetta gerði Lambi eftir að maðurinn rak nefið inn í búðina, spurði hvort Lambi væri þar einn og sagði þegar Lambi játaði því 'já, þá neyðist ég bara til að fara eitthvert annað'.

"LAMBI" - EINS OG STJÖRNURNAR

2007-01-30T14:54:00.000-08:00

Lambi hefur, eftir afkastamikla sundferð, komist í hóp með ekki ómerkari konum en Lindsey Lohan og Brittney Spears. Eins og mikið hefur verið skrifað um í morgunblaðinu að undanförnu (því jú víst kann Lambi að lesa blöðin eins og hinir bloggandi ættingjar hans) eru þessar tvær einstaklega dugleagar að sýna á sér líkamsparta sem óæðra fólk hylur öllu að jöfnu. Lambi er víst ekki svo heppinn að vera frægur og má því ekki búast við því að neinar myndir úr ferðinni birtist í blöðum heimsins. En í þessari merku sundferð (þar sem Lambi að sjálfsögðu var í brók en missti niður annan hlírann) tókst honum að flassa 3 unglingsstúlkur. Nú, hefði þetta gerst innan marka kynjabundinna búningsklefa hefði Lambi ekki vakið nærri eins mikla lukku! Og það vissi hann! Því beið Lambi með að láta hlírann renna fram af þartil einhverjar litlar sálir sem mundu veita þessu mikla athygli voru nærstaddar. OG VITI MENN! Þessar litu sálir (sem álpuðust í sund um leið og illmennið hann Lambi) munu líkast til aldrei bíða þess bætur að hafa rekið augun í brjóst í niða myrkri og kolröngu umhverfi.

DYRU AFMÆLISGJAFIR LAMBA

2007-01-24T14:46:00.000-08:00

Eins og allir aðdáendur Lamba vita átti Lambi afmæli um daginn. Lambi náði þeim merka áfanga að verða 24 ára þann 20. janúar síðastliðinn. Lambi mun nú vegna þrýstings frá eldri systur sinni (sem er, fyrst Lambi er nú á annað borð að tala um aldur og afmæli, þrítug) segja frá þeim fjölmörgu og góðu gjöfum sem hann fékk.

Frá eigendum sínum fékk Lambi:

1 pk. Lambi snýtupappír
gullleggings
kjól
kalt vax

Frá ömmu:

síðermabol
rúllukragamagabol
1 par ullarinniskór

Frá Helgu:

1 seðil að andvirði 5000 kr

Frá Tinnu og Eiríki:
2 sérvaldar bækur (lambi þorir ekki annað en segja "besta gjöfin")

Frá afkvæmi systur:
-mynd af afkvæmi

Frá foreldrum Sigurdurgs:
-borðofn með helluborði

Frá Sigurdurgi sjálfum:
1 st stækkara
3 st bakka
10 st ljósmyndapappír
1 st filma
2 st spólur
1 st spólubox
1 st þrífót
1 st rauð pera
2 st tangir
4 brúsar vökvar
1 st hitamælir
1 st trekt
2 st mæliglös

Útistandandi eru gjafir frá bróður lamba og ástkonu hans

HETTU-LAMBI

2007-01-18T10:38:00.000-08:00

Lambi hefur alltaf verið umtalaður vegna geislandi fegurðar sinnar. Sé talað um fegurð verður mönnum ætíð hugsað til Lamba og þeirrar fegurðar sem hann býr yfir, jafnt að innan sem utan. Því brá mörgum í brún, Lamba sjálfum sérstaklega, þegar Lambi vaknaði ljótur einn daginn. Lambi greip um höfuð sér og fann fyrir ljótleikanum undir lófanum. Lambi fór að hrína en við það breiddi lótleikinn aðeins úr sér lítið eitt. Lambi vaknaði svo á hverjum degi í tvær vikur við það að ljótleikinn hafði tekið undir sig enn stærri part af Lamba. Kollurinn á Lamba var bólginn og bjagaður af ljótleika. Lambi varð svo ljótur að honum var bannað, af læknum, að fara út úr húsi. Ekki vegna þess að Lamba gæti sakað sjálfan, heldur hefði hann aukið slysahættu í nánasta umhverfi sínu. Menn sem sáu Lamba á þessum tíma hlupu annað hvort öskrandi burt eða störðu og bentu. En þessi óhamingja Lamba átti sér orsök, það er nefnilega þannig að hinir ýmsu sjúkdómar geta gert jafnvel fallegasta fólk herfilega ljótt! Og Lambi var með hettustótt. Lambi varð ljótur bæði að innan sem utan (og er það oftast tilfellið því biturðin heltekur þá ljótu). Hann hafðist við í helli sínum og bjó til ljótar jólagjafir handa fallegum ættingjum sínum. Nú hugsið þið eflaust, lesendur góðir, "þetta er óhugsandi! ég mun aldrei trúa þessu uppá Lamba." En þó minnið sé brigðult er myndin það ekki og því birtir Lambi hér sönnunargögn sín. Þetta verk mun Lambi kalla: "Um tíma var Lambi ljótur".

HUGMYNDASNAUÐUR LAMBI

2007-01-16T14:03:00.000-08:00

Já nú er ég loksins kominn með internetið. Ég fékk það reyndar fyrir nokkru (tæpri viku) en var þá blessunarlega búinn að gleyma þessu bloggi. Ætlar Lambi ekki að fara að blogga? - spurðu menn sig og loks Lamba. Lambi velti vöngum, hann vissi vel að hann var vondur bloggari. Hann hugsaði með sér, "ég er hugmyndasnauður, latur og ekki síst spéhræddur þegar bloggið er annars vegar, hversvegna blogga? Verður mönnum illa við mig ef ég hætti? Verður mönnum illa við mig ef ég held áfram kannski?" Lambi varð þá þunglyndur, hann faldi sig í nokkra daga og vildi engan sjá. Tilvistarkreppa tilkomin af bloggtregðu sveif yfir lamba. Svo gleymdi hann blogginu aftur (glöggir lesendur hafa nú áreiðanlega veitt því athygli að Lambi er afar gleyminn, bravó!). Í dag hinsvegar mundi ég allt í einu eftir því að ég átti þetta blogg, rifjaði upp aðgangsorðið og settist niður við að skrifa. Góðir ættingjar ég hef eytt klukkustundum í þessa færslu og bið þess að þið verjið í það minnsta jafnlöngum tíma í að velja fyrir mig afmælisgjöf. Lambi hefur veitt því athygli að hann á afmæli afar sjaldan, of sjaldan. Hann hefur velt því fyrir sér og komist að þeirri niðurstöðu að ættingjar hafi nógan tíma til þess að velja fallegar gjafir handa honum afmæla á milli. Þeir geti eytt dögum, vikum eða jafnvel mánuðum í valið. Eftir þessa uppgötvun sína er Lambi nú sannfærður um að allar gjafir verði góðar eða í það minnsta skilanlegar (og þá dýrar). Lambi vill nú taka það fram að hann er hvorki gráðugur né heimtufrekur og hafi einhver misskilið mál Lamba er sá hinn sami beðinn um að afmisskilja það hér með!

Lambi hefur enn og aftur haft niðurgang, eins og einhver indæll ættingi orðaði það hér fyrir nokkru, og er mikið í mun að ljúka máli sínu svo hann komist í bólið.

Óprúttnir ættingjar

2007-01-03T08:03:00.000-08:00

Ef færslurnar hans Lamba eru ekki nógu góðar fyrir ykkur fáið þið einfaldlega ekki fleiri. Lambi ætlar að koma sér upp öðru bloggi og finna sér nýja lesendur!

LAMBI BLOGGAR SEM ÓÐUR VÆRI

2006-12-20T02:39:00.000-08:00

Ég hef tekið eftir því að kommentin verða fleiri eftir því sem lengra líður milli færslna. Þykir ykkur þetta jákvæð skilyrðing? Þið, góðu og vel metnu lesendur, virðist hafa unnið meira að bloggi lamba hingað til en lambi sjálfur. Lambi mun nú taka til við að bæta úr því. Hann hefur heyrt að "bílskúrinn" verði líkast til ekki netlaus fram yfir jól og þá ætti lambi að geta bloggað vel yfir morgunverðinum alla daga.

Annars er það af lamba að frétta að hann lenti í ansi óprúttinni konu áðan. Lambi sat við vinnu sína (því jú, víst vinnur lambi af hörku þó hann sé bæði með bronkitís og blóð í kviðarholinu (af óskiljanlegum ástæðum, já það var læknir sem reyndi að útskýra þetta fyrir lamba)). Þá kemur inn þessi óprúttni kvenmaður og ætlast til þess að lambi láni símann. Verandi hjartahlýr og vel innrættur eins og (þið vitið að) lambi er leyfir hann kvenmanninum að hringja en tekur það þó fram að símtalið megi ekki standa of lengi. Konan hringir, segir nokkur orð og biður svo lamba um að fara á bakvið svo hún geti talað í næði. Lamba hitnar í framan, ekki bjóst hann við þessu! Lambi veit ekki hvernig hann á að bregðast við en segir þó að hann fari ekki fet því að sjálfsögðu getur lambi ekki skilið fólk (sérstaklega undarlegt fólk sem biður um að fá að vera eitt) eftir eitt í búðinni. Lambi bætir því síðan við, og það kemur frá hjartanu, að hann hafi engan áhuga á símtali konunnar svo henni sé frjálst að tala því lambi sé ekki að hlusta. Svo líður og bíður og ekki greinir lambi nein merki þess að konan sé á því að leggja á. Lambi er á þessum tímapunkti orðin óþolinmóður og til þess að sanna það fyrir sjálfum að hann hafi fullan rétt á að gera hvað sem honum sýnist í búðinni, leggur hann loks við hlustir. Lambi heyrir væl og vein. Almáttugur minn! -Hugsar lambi. Þetta á þá engan enda að taka. Lambi reynir með látbragði að flæma konuna úr símanum, hann ræskir sig, trommar með fingrunum og þá....allt í einu...er lambi beðinn enn á ný um að fara burt! Þessi ósvífna kona hefur misskilið greiðvirkni lamba. Hún heldur nú að lambi sé undirlægja og láti bjóða sér hvað sem er!? Lambi ítrekar áhugaleysi sitt fyrir símtalinu og bætir því við að konan sé nú búin að vera einum of lengi. Konan reynir áfram að bola lamba burt "ég þarf að lesa upp reikningsnúmer og ég vil ekki að þú heyrir". Lambi hlær innra með sér. Hvað á hann að gera við reikningsnúmer, laumast til þess að leggja inn á annara manna reikning? (þó lambi hafi átt við það vandamál að stríða fyrr á tímum að leggja inn á reinknga í gríð og erg þá hann komst yfir reikningsnúmer er annað upp á teninginn núna, lambi fór í meðferð og er búinn að læra að peningar hans gagnast honum ekkert þegar þeir eru komnir inn á reikninga annara.) Reikningsnúmer væri lamba vita gagnslaust þó hann heyrði það og það segir hann konunni. Loks gefst þá konan upp á að reka lamba burt. Lambi er þá farinn að hnykkla brýrnar og setja sig í stellingar. Konan er farin að pirra hann. En konan fer. Eða svo heldur lambi sem hrekkur í kút þegar konan segist, á leiðinni út, ætla að koma við aftur með pening fyrir símtalinu og bíða hjá lamba eftir því að verða sótt. Lambi vill öskra! Lambi vill fá að vera í friði í búðinni, hann segist ekki vilja sjá neina borgun og hálfpartinn ýtir konunni á undan sér út.
Eftir þetta sest lambi niður við að blogga. lambi er hálfnaður með sögu sína af óbermis konunni þegar inn kemur önnur undarleg manneskja. Í þetta sinn maður. Maðurinn staldrar ekki lengi við og fær því ekki eins á lamba. Maðurinn sýnir lamba áður en hann fer sólgleraugun sín (útötuð í súkkulaðinu sem maðurinn er að borða). Svo fer maðurinn en lofar þó fyrst (og nei lambi gekk ekki á hann) að líta aftur við hjá lamba. Hann skilur súkkulaðið eftir.

Nú er lambi einn

frændi þinn?

2006-12-07T03:34:00.000-08:00

Börn nú til dags eru farin að minna æ meir á hið alræmda dvergakyn sem illmögulegt hefur reynst að útrýma með góðu móti. Er mögulegt að dvergarnir séu farnir að dulbúast sem börn eða hafa þeir aðeins haft áhrif á börnin? Að minnsta kosti þykir mér tími til kominn að fara úr hörðu í aðeins harðara!

Það stóð skratti við glugga andspænis mér, þar sem ég beið eftir því að Sigurður og bíllinn birtust. Biðin varð vandræðaleg um leið og þetta meðalstóra barn vippaði upp, á ljóshraða (snöggar hreyfingar eru einmitt aðalsmerki dverga), myndavél sem það leit út fyrir að vilja skjóta mig með (dvergar eru mjög illskeyttir) og fór að stilla fókus. Ég, sem kann því illa að bíða og enn verr að vera mynduð í laumi (einkum af dvergum), snéri mér eldsnöggt við og mjakaði mér meðfram vegg þartil ég komst fyrir horn og úr augsýn þessa kvikindis. Þar sem ég stóð rjóð og undrandi bakvið Optik, fannst mér hugmynd mín um lágmarkshæð á borgarbúa ekki alslæm og liggur við bara töfrandi. Ég gekk hugsi burt frá frænda dvergsins þessari vörtu samfélagsins sem þrjóskast við að halda úti njósnastarfsemi á kostnað frelsis hins almenna borgara.

2006-12-03T12:38:00.000-08:00

Sigurður tók líka prófið hann á eftir, eins og Tinna, að deyja án þess að nokkur verði þess var. Ætli ég verði ekki of upptekin við að vera reið til þess að taka eftir því að hann sé dauður (kannski verð ég þegar orðin evil robot).

Your Deadly Sins

Sloth: 80%

Gluttony: 60%

Lust: 60%

Envy: 40%

Greed: 40%

Wrath: 40%

Pride: 20%

Chance You'll Go to Hell: 49%

You will die while sleeping - and no one will notice.

How Sinful Are You?

Loðnefjaðir enda yfirleitt í helvíti

2006-12-01T05:13:00.000-08:00

Your Deadly Sins

Wrath: 100%

Pride: 80%

Envy: 60%

Sloth: 60%

Greed: 40%

Lust: 20%

Gluttony: 0%

Chance You'll Go to Hell: 51%

You will die, but first you will turn into an evil robot.

How Sinful Are You?